ब्रेकिंग

गुन्हेगारी जगत

पती आणि सासू येरवडा कारागृहात

Wrutuja pandharpure
30 May 2025

मैत्रिणी व नातेवाईकांची चौकशी होणार

पुणे : वैष्णवी हगवणे मृत्यू प्रकरणात पती शशांक, सासू लता आणि नणंद करिश्मा यांची गुरूवारी न्यायालयाने येरवडा कारागृहात रवानगी केली. वैष्णवी यांना सासरच्या मंडळीकडून झालेल्या त्रासाबाबत त्यांच्या मैत्रिणी आणि नातेवाईक यांच्याकडे चौकशी करण्यात येणार आहे, अशी माहिती पोलिसांनी न्यायालयात दिली.

हुंड्यासाठी मानसिक, शारिरीक छळ करून वैष्णवी हगवणेला आत्महत्येस प्रवृत्त केल्याप्रकरणी अटकेत असलेला पती शशांक राजेंद्र हगवणे (वय २७), सासू लता राजेंद्र हगवणे (वय ५४) व नणंद करिश्मा राजेंद्र हगवणे (वय ३१) यांना न्यायालयाने बुधवारी (दि.२८) गुरूवारपर्यंत (दि.२९) एक दिवसाची पोलिस कोठडी सुनावली होती. तर सासरा राजेंद्र तुकाराम हगवणे (वय ६३) व दीर सुशील राजेंद्र हगवणे (वय २७) यांना ३१ मेपर्यंत पोलिस कोठडी सुनावण्यात आली आहे.

निलेशचा राजेंद्र आणि सुशिल याच्या मदतीने शोध घेण्यात येत आहे. तर लता, करिश्मा व सुशिल हगवणे यांच्या मोबाईलचा देखील शोध सुरू आहे. चव्हाण व सुशिल यांच्यामधील गुन्ह्याच्या अनुषंगाने झालेले चॅट, मेसेज हे पुराव्यासाठी जप्त करण्यात येत आहेत. त्यामुळे शशांक, लता आणि करिश्मा यांच्या पोलिस कोठडीचे हक्क अबाधित ठेवून त्यांना न्यायालयीन कोठडी सुनावण्यात यावी, असा युक्तीवाद सरकारी वकील नितीन अडागळे यांनी केला. दोन्ही पक्षाचा युक्तीवाद ऐकून घेत प्रथमवर्ग न्यायदंडाधिकारी व्ही. पी. खंदारे यांनी आरोपींना न्यायालयीन कोठडी सुनावली.वरिष्ठ पोलिस निरीक्षक अनिल विभूते या गुन्ह्याचा तपास करत आहे. आतापर्यंत केलेल्या तपासाची सविस्तर माहिती त्यांनी न्यायालयात दिली.

निलेश चव्हाणचा शोध सुरू..

वैष्णवी यांच्या मुलाचा ताबा घेण्यासाठी गेलेल्या कस्पटे कुटुंबियांना पिस्तुलाचा धाक दाखवत धमकी दिल्याप्रकरणी गुन्हा दाखल असलेला आरोपी निलेश चव्हाण हा अद्यापही फरारी आहे. पोलिस त्याच्या मागावर असून तो अद्याप मिळून आलेला नाही.